منابع محلی در غور از آغاز کار ساخت پنج شبکهٔ آبرسانی به هزینۀ بیش از ۴۱ میلیون افغانی در این ولایت خبر داده می‌گویند که با تکمیل آن ۱۶٠٠ خانواده به آب آشامیدنی صحی دسترسی پیدا خواهند کرد.
ذبیح‌الله غوثی‌زاده، مسؤول دفتر رسانه‌های ریاست احیا و انکشاف دهات غور می‌گوید که کار ساخت پنج شبکهٔ آبرسانی به هزینهٔ ۴۱ میلیون و ۴۶٠ هزار و ۶۵۲ افغانی از کمک مالی صندوق وجهی ملل متحد برای کودکان (یونیسف) در این ولایت امروز آغاز گردید.
به گفتهٔ وی، این پروژه‌های آبرسانی در قریه‌های «سنگ‌زرد» و «نوه‌تنگ و منگ» ولسولی چهارسده، در قریۀ «دهن غال‌ملا» در ولسوالی دولینه و مناطق «پایین تگاب»، «غلمین» و «بادگاه» شهر فیروزکوه، مرکز ولایت غور تطبیق می‌شود.
موصوف تصریح کرد، با تکمیل این پروژه‌ها ۱۶٠٠ خانواده به آب آشامیدنی صحی دسترسی پیدا می‌کنند و فرصت‌های شغلی نیز برای ده‌ها تن از باشنده‌گان محل فراهم گردیده‌است.
برخی باشنده‌گان این ولایت از آغاز این پروژه‌ها استقبال کرده و تاکید کردند که با تکمیل این پروژه‌ها بخش بزرگ از نیازمندی‌های آنان از ناحیه آب آشامیدنی صحی رفع می‌شود.
نویسنده: ذبیح‌الله وفا
